كيفية حماية عينك من الرمد الربيعي!
- طبي
- May 03, 2023
لو ساعات بتلاقي عينيك مع بداية فصل الربيع أحمرت فجأة و حصل فيها التهابات وبتدمع و أنت مش عارف السبب ايه فى المقالة دي هنقولك ايه هو الرمد الربيعي وازاي تحمي نفسك منه
الرمد الربيعي هو نوع من الحساسية الموسمية اللي بتصيب ملتحمة العين والجفن بتنتشر أكتر بين الأطفال أقل من 16 سنة ولكن برضه الكبار ليهم نصيب ولو حصلهم الحساسية دي بعد سن ال 16 بتفضل ملازماهم طول حياتهم.
والرمد الربيعي اتسمى بالاسم ده علشان مرتبط بفصل الربيع وبينتشر فيه بسبب التراب الشديد فى الجو من الأشجار وبسبب انتشار حبوب اللقاح فى الربيع والدخان المنتشر سواء من التدخين أو العربيات وكمان بسبب الجو الحر فكل ده بينتج عنه مجموعة كبيرة من البكتيريا و الفيروسات هي اللي بتخلي عينينا فيها حكة ووجع واحمرار.
لو بتعاني من الرمد الربيعي لازم تروح لدكتور علشان يقولك نوع القطرة اللي أنت محتاجه ومتاخدش حاجة من نفسك لكن احنا
هنقولك شوية حاجات تتجنبها علشان تحافظ على عينك:
– حاول على قد ما تقدر ماتعرضش نفسك تراب يعني ماتنقيش الوقت اللي فى عواصف وتنزل تخرج فيه لو سمحت يعني.
– ماتحاولش تقعد في أماكن فيها جناين وقت طويل ماحبكتش يعني.
– لو مضطر تنزل في وقت الدنيا فيه حر و تراب يفضل تلبس نضارة شمس علشان تحميك.
– لو لقيت عينيك واجعاك وفيها حكة ماتقعدش تنخرب فيها سيبها زى ماهي علشان متتعبش أكتر.
– يفضل اننا مانستخدمش المكياج أو أى منتجات تجميلية قريبة من العين.
– وطبعا لو الالتهابات زادت عن العادي ماتستخدمش أى أدوية من غير ما تسأل الدكتور بتاعك الأول.
