٦ نصائح للحفاظ على صحة الكلى!

في اليوم العالمي للكلى.. كتير مننا بيهمل في صحة كليته ومابيبدأش ياخد باله أو يهتم غير لما يتعرض لأي مشكلة صحية زي الأملاح والحصوات وصولًا للفشل الكلوي، ومعظم أمراض الكلى بتبقى في المراحل الأولية بدون اعراض واضحة بالتالي بيتفاجأ المريض بيها وعشان الوقاية خير من العلاج هنقولك دلوقتي على شوية نصائح لو اتبعتها هتحافظ على صحة كليتك

١- شرب المياه 

ممكن تكون نصيحة بديهية، أو هتقول ما إحنا عارفين، بس الحقيقة إن أهم شيء يضمن عمل الكليتين بكفاءة هو شرب المياه بما لا يقل عن 2- 3 لتر يوميًا، لأن أقل من كده ومع العوامل الخراجية اللي بيتعرض ليها الجسم هيبقى في نسبة جفاف في جسمك وزيادة لنسبة الأملاح والصديد وتكوين الحصوات

٢- راقب البروتين

على قد ما تناول البروتينات صحي ومفيد ليك على قد ما عدم مراقبتك لكمية استهلاكك للبروتين ممكن تبقى مؤذية للكلى، خاصة البروتين المٌصنع زي اللي بيستخدمه الرياضيين، وزيادة نسبة البروتين في الدم بتؤدي لزيادة نسبة “اليوريا” واللي بتسبب ضرر كبير للكلى

٣- تقليل استخدام الأدوية والمسكنات 

تناول الأدوية والمسكنات تحديدًا بدون روشتة من دكتور ولفترات طويلة بيأثر على عمل وظائف الكلى، وطبقًا للدكتور “طارق البشلاوي” استشاري الباطنة والكلى بمستشفى أحمد ماهر التعليمي أن  أن الأقراص المسكنة تعمل على زيادة إفراز مادة “البروستاجلاندين” وهي المسئولة عن تسكين الألم في المناطق المصابة.وأضاف البشلاوي، أن مادة البروستاجلاندين الموجودة في الكلى تعمل على اتساع شرايين الكلى وذلك لتسهيل تدفق الدم الواصل إليها وبالتالي تحسين التغذية الدموية التي تصل إليها ولكن مع تناول المسكنات يقل إفرازها في الكلى وبالتالي تتسبب في تقليل الدم الواصل للكلى والمسئول عن تغذيتها وبالتالي تقل كفائتها الوظيفية المسئولة عن التخلص من السموم الموجودة في الجسم فتترسب على أنسجة الكلى وتؤدي لتعرضها للالتهاب

٤- مراقبة مستوى السكر في الدم، وضغط الدم

ارتفاع ضغط الدم هو أول مؤشر على وجود خلل ما في وظيفة الكلى، ذلك أن الضغط المرتفع المستمر يلحق الضرر بالأوعية الدموية ويسبب ضرراً في وظيفة الكلية في تصفية السموم من الدم، وهو ما يسبب الفشل الكلوي، كذلك إرتفاع مستوى السكر في الدم يؤدي لنفس النتيجة

٥- التوقف عن التدخين

التدخين بيدمر الأوعية الدموية في الجسم، وبيسبب تباطؤ تدفق الدم في جميع أنحاء الجسم والكلى، وبيزود نسبة خطر إصابة الكليتين بالسرطان

٦- البعد عن التوتر 

مشاعر زي التوتر والقلق، بتساهم في التأثير على عمل الكليتين بكفاءة وكمان بتساهم في ارتفاع ضغط الدم واللي زي ما ذكرنا قبل كده بيأذي الكليتين

وفقًا لتقرير منظمة الصحة العالمية سنة 2017، فإن عدد الوفيات الناجمة عن أمراض الكلى في مصر يبلغ 20 ألفًا و433 حالة سنويًّا، أي ما يعادل 32.88 حالة بين كل 100 ألف مصري، لتحتل مصر بذلك المرتبة الـ20 بالنسبة لعدد الوفيات الناتجة عن أمراض الكلى على مستوى العالم،  وده رقم عالي، عشان كده اتباع النصائح اللي ذكرناها دي ممكن يجنبك أمراض الكلى ويحافظ على صحتك.