الالتهاب الرئوى..أعراضه ومدى خطورته وطرق الوقاية منه!

الالتهاب الرئوي مش مجرد كحة وهتروح زي ما بعض الناس معتقدين، لكنه مرض خطير.. وبحسب تقرير نشرته منظمة الصحة العالمية إن الالتهاب الرئوي يمثل 15% من مجموع وفيات الأطفال تحت سن الـ 5 سنين ومات منه حوالي 900 ألف طفل في عام 2015 بس.

وده اللي بيخلينا نسأل إيه هو الالتهاب الرئوي؟

بتعرّفه منظمة الصحة بإنه شكل من أشكال العدوى التنفسية الحادة اللي بتصيب الرئتين وأساسًا الرئتين بيتكونوا من أكياس صغيرة ، والأكياس دي بتتملي بالهوا لما يتنفس الشخص السليم . لكن المصاب بالالتهاب الرئوي بتتملي الرئتين بمواد سائلة بتمنع دخول الأكسجين وبتخلي عملية التنفس مؤلمة.
 

ايه أنواع العدوى وبتيجي إزاي؟

– العدوى البكتيرية هي الأكثر انتشارًا ويحدث هذا النوع من الالتهاب الرئوي من تلقاء نفسه أو بعد إصابتك بالبرد أو الإنفلونزا. وربما يؤثر على جزء واحد من الرئة

– العدوى الفطرية وده نوع منتشر بين المصابين بمشكلات صحية مزمنة أو ضعف جهاز المناعة عن طريق التنفس وممكن تكون الفطريات المسببة له في التربة أو فضلات الطيور.

– العدوى الفيروسية اللي منها فيروس كورونا المستجد (كوفيد-19). وممكن ييجي برضه بسبب فيروسات البرد والإنفلونزا. والفيروسات هي اكتر سبب لإصابة الأطفال اللي بتقل أعمارهم عن خمس سنين  بالالتهاب الرئوي.

وكل مرض له أعراض ..طب إيه هي أعراض الالتهاب الرئوي؟

حسب موقع مايو كلينك المختص بالشأن الطبي الأعراض ممكن تكون واحدة من دول أو أكثر من عرض مجتمعين:
– ألم في الصدر عند التنفس أو سعال

– تشويش ذهني (في البالغين من عمر 65 وأكبر)

– سعال وأحيانًا بيكون مصحوب ببلغم

– إرهاق وحمى
– عرق ونفضان أثناء الكحة

درجة حرارة جسم أقل من الطبيعية (في البالغين الأكبر من 65 عامًا والأشخاص ذوي الجهاز المناعي الضعيف)

غثيانًا أو قيئًا أو إسهالاً

ضيق النفس

ما هي طرق الوقاية وإزاي نحصن نفسنا وأطفالنا من الالتهاب الرئوي؟

– مراجعة الدكتور الخاص بيك عشان تتلقى تطعيم مناسب أنت أو أطفالك ضد الالتهاب الرئوي والإنفلونزا.

– بتوصي الدكاترة بتطعيم مختلف للأطفال اللي بتقل أعمارهم عن سن سنتين واللي بتتراوح أعمارهم بين 2 و5 سنوات لأنهم عرضة بشكل أكبر
وبتوصي الدكاترة برضه بجرعات تطعيم الإنفلونزا للأطفال الأكبر من 6 أشهر.

– نغسل إيدينا بانتظام أو نستخدم مطهر لليد يحتوي على الكحول لحماية الجهاز التنفسي من العدوى.

–  نبعد تمامًا عن التدخين ونمارس الرياضة ونحاول نعمل نظام غذائي صحي.

– ناخد قدر كافي من النوم اللي بدوره بيقوي جهاز المناعة.