ما هى علامات السكتة الدماغية وكيفية الوقاية منها؟

وفقًا لمنظمة الصحة العالمية بيعاني 15 مليون شخص في العالم من السكتة الدماغية سنوياً و5 مليون منهم بيموتوا و5 مليون بيصابوا بالعجز الدائم و5 مليون بيتم إنقاذهم…  الأمر اللي بيلفت الانتباه للمرض ده والسكتة الدماغية منتشرة في عمر ال40 ونادرًا لما تصيب الشباب إلا في حالات ارتفاع ضغط الدم.

يعني إيه سكتة دماغية ؟
يعني توقف ضخ الدم في أجزاء الدماغ وبالتالي الأكسجين مش بيغذي الأجزاء دي فبيحصل موت لخلايا الدماغ خلال دقايق معدودة وبتأثر على وظائف مختلفة من الجسم متصلة بأجزاء الدماغ المصابة ده نوع وفيه نوع تاني بيحصل لو حصل نزيف في الدماغ نتيجة حادثة أو إرتفاع شديد في ضغط الدم.

هل فيه أعراض تعرفك باحتمالية وجود سكتة دماغية؟
حسب موقع مايو كلينك المهتم بالشأن الطبي فيه علامات لو ظهرت عليك في الغالب انت داخل على سكتة دماغية أو حصلتلك بالفعل ولازم يتم إنقاذ الموقف:

• تشويش ومشكلة في الكلام وممكن تقول كلام عشوائي مش مفهوم وعدم استيعاب للي يتكلم حواليك.
• شلل بيخليك مش قادر تتحكم في دراعك ولا تحرك رجليك أو تنميل في الوجه أو سقوط جانب من الفم وغالبًا ده بيحصل في جانب واحد من الجسم.
•  مشكلة في الرؤية في العين يعني بتشوف ضباب أو مزغلل بتشوف الحاجة اتنين.
• الصداع المفاجئ والشديد ممكن يكون مصحوب بالقيئ أو غياب جزئي عن الوعي.
• صعوبة في المشي. بيحصل خلل في التوازن ودوران ودوخة.

إيه هي أساليب التشخيص؟
وضح موقع ويب طب بعض الفحوصات اللي بتكشف عن وجود سكتة دماغية:

• فحص جسمانيّ.
• أشعة موجات فوق صوتية (Ultrasound) للشريان السّباتي (Arteria carotis).
• تصوير الشرايين (Arteriography).
• الأشعة المقطعية  (CT).
• أشعة الرنين المغناطيسي (MRI).
• تخطيط صدى القلب (Echocardiography).

وأخيرًا نحمى نفسنا إزاي من السكتة الدماغية؟
بيوضح موقع ويب طب أهم أساليب وطرق الوقاية اللي منها:

• تجنب العصبية أو الحزن الشديد أو التفكير المبالغ فيه والبعد عن أئ مزعج خاصة لمرضى السكري أو مرضى الضغط.
• البعد تمامًا عن التدخين لإنه بيعرضنا لحدوث تجلط في الدم بشكل كبير.
• ممارسة الرياضة لإنها بتجدد حرجة الدورة الدموية وتمنع الإصابة بتجلط الدم.
• البعد عن إدمان المخدرات والكحوليات.
• التغذية السليمة زي ما احنا عارفين ليها دور كبير وفعال في الحماية من بعض الأمراض زي السكتة الدماغية وهنا توصلت جمعية الجلطات الدماغية الأمريكية إلى زيادة احتمالات الحماية من الإصابة بالسكتة بنسبة22% عند تناول السمك مرة واحدة وتزداد إلي27% في حالة تناوله من ثلاث إلي أربع مرات أسبوعيا وترتفع إلي52% لخمس مرات في الأسبوع.