إيه هي أنواع الحروق والإسعافات الأولية للتعامل مع الحروق!

في الأول قبل ما نعرف إزاي نتعامل مع حوادث الحروق لازم نعرف إيه هي أنواع الحروق ودرجاتها واللي هما 4 درجات.

أنواع الحروق:

1-  حرق من الدرجة الأولى: الإصابة بتكون في الطبقة الأولى من الجلد

2- حرق من الدرجة الثانية: الإصابة بتكون في الطبقة الأولى والثانية من الجلد وممكن أعمق من كده

3- حرق من الدرجة الثالثة: الإصابة بتكون في كل طبقات الجلد والأنسجة تحت الجلد.

4- حرق من الدرجة الرابعة: الإصابة بتخترق الجلد وتوصل للعضلات، والأربطة، والأوردة، والأعصاب، والأوعية الدموية والعظام

تاني حاجة محتاج تعرفها إزاي تتعامل مع حوادث الحروق وهو عن طريق إنك تخليك مستعد إن أي حد ممكن يتحرق.. فأنت محتاج تعمل 3 خطوات في الأول من ضمن الإسعافات الأولية وهما:

1- أنقل الشخص المصاب من منطقة الخطر وكلم الإسعاف على رقم 123

2 .اطفي النار أو أبعد الشخص المصاب عن مسببات الحرق (نار، سوايل سخنة، بخار….إلخ)

3- ساعد الشخص المصاب “ميتحركش….ينام على الأرض…و يلف” عشان النار تطفي

ومن ضمن الإسعافات الأولية برضه إنك تبقى عارف إزاي تتعامل مع الحروق بطريقة صحيحة واللي هو بيكون بالخطوات دي:

1- برد المنطقة المصابة بمياه فاترة عن طريق:

1. حط المنطقة المصابة تحت مياه جارية فاترة لحد ما الوجع يروح
2.  لو مافيش مياه جارية استعمل كمادات مياه
3. أوعى تفرقع فقاقيع المياه اللي بتظهر بعد التعرض لحرق
4. ماتحطش ثلج ولا مادة دهنية ولا معجون سنان ولا أي كريمات أو مراهم لإن ده بيزود الضرر وممكن الحرق يتلوث

2 .احمي الحرق عن طريق:

1. شيل الهدوم بالراحة جدا من على المنطقة المصابة
2. لو الهدوم لازقة في المنطقة المصابة قص بمقص من حواليها
3. شيل الساعة أو أي مجوهرات من المنطقة المصابة قبل ما تبتدي تورم.
4. غطي المنطقة المصابة بشاش يكون غير لاصق، ولو المنطقة المصابة كبيرة غطيها بملاية أو بأي قطعة قماش عشان ماتعرضش الجرح للتلوث.
5. لو صوابع الإيد أو الرجل لازقين في بعضهم افصلهم بقطعة شاش معقمة

3 .غطي الشخص المصاب ببطانية بس متحطهاش على المنطقة المصابة

4 .لو الوش أو العين مصابين بحرق حاول تخلي المصاب في وضع الجلوس

5 .إزاي تمنع المصاب يجيله صدمة عصبية لو المصاب ماعندهوش إصابة في الرأس أو الرقبة أو الرجلين:

1. ارفع رجله حوالى 30 سم
2. ارفع الأماكن المصابة بالحروق فوق مستوى القلب إن أمكن
3. لو في إصابة في ممرات التنفس ماتحطش رأس المصاب على مخدة
4. راقب النبض و التنفس عشان تتأكد إنه ماحصلوش أي صدمة عصبية لحد ما الإسعاف تيجي

6 .لو في ألم، اديله مسكين

7 .لو الإصابة حرق من الدرجة الثالثة أو الرابعة إتصل بالإسعاف على رقم 123 ، وبعدين اعمل الخطوات الإسعافية اللي فوق دي.

بعض حالات الحروق بتحتاج لتدخل طبي عاجل في الحال وهما زي:

1- الإصابة كبيرة أو عميقة (أكبر من حجم إيد المصاب)

ّ 2- حصل تغير في لون الجلد إلى الأبيض أو التفحم

3- الإصابة عملت فقاعة ميه أكبر من 5 سم

لو لاحظت علامات تلوث الإصابة زي زيادة الآلم، الاحمرار، التورم أو رشح أو حرارة الجسم ارتفعت

أما بيكون فيه إصابات تانية محتاجة عناية وهي زي:

1- اللي بيظهر عليها بداية علامات حدوث صدمة عصبية زي الإحساس بالبرودة، أو رطوبة الجلد، أو التعرق، وبطء أو سرعة التنفس، أو ضعف ودوخة

2- الحامل

3- المصاب فوق سن ال 60 أو تحت سن 5 سنوات

4- المصاب عنده حالة مرضية تانية زي أمراض القلب، أو الرئة، أو الكبد أو عنده مرض السكر

5- المصاب عنده ضعف فى الجهاز المناعى أو بياخد علاج كيماوى

الحروق مش دايما بتكون بسبب النار أو البوتاجاز أو الأنبوبة.. فيه أنواع حروق تانية وأسبابها بتكون من الشمس أو من ماس كهربائي أو من مواد كيميائية.. خلينا نقولك إزاي يتم الوقاية من كل نوع حرق فيهم وإزاي يتعالج لو لا قدر الله وحصل: 

1- حروق الشمس:

• الوقاية من حروق الشمس:

1- ماتتعرضش للشمس في الأوقات بين الساعة 11 صباحًا و 3 مساءًا، وفي الوقت اللي بتكون الشمس فى أقصى قوتها

2- ماتعرضش الأطفال تحت سن 6 شهور لضوء الشمس المباشر خصوصًا في نص اليوم

3- البس ملابس واسعة من القطن

4- البس برنيطة كبيرة تغطي وشك ورقبتك

5- استخدم كريمات الحماية من الشمس على الأماكن اللي بتتعرض للشمس كذا مرة في اليوم

أما العلاج من حروق الشمس بيكون بـ 

ِّي الأماكن المصابة بالجلد.

1- استحمى بمياه فاترة علشان تهدى الأماكن المصابة في الجسم 

2- حط كريم ترطيب على المناطق المصابة

3- ماتفرقعش فقاقيع المياه اللي بتظهر نتيجة لإصابة الجلد

4- لو حاسس بالألم خد مسكن

5- اشرب ميه كتير

6- خد بالك من علامات الإجهاد الحراري وضربة الشمس زي الدوخة

2- حروق بسبب الكهرباء: 

1- ماتمسكش المصاب بإيدك

2- افصل الكهرباء عن الجهاز المتسبب فى الإصابة أو افصل التيار الأساسي

3- ابعد المصاب عن مصدر الكهرباء

4- لو مش عارف تفصل التيار عن طريق المصاب :

1. اوقف على سطح جاف زي مشاية مثلا أو شوية ورق أو كتب.
2. ماتقفش جنب أو على مياه 
3. استخدم عصاية خشب تبعد بيها المصاب عن مصدر الكهرباء
4. ماتستخدمش حاجة حديد أو أي حاجة مبلولة

5- ولو المصاب مش واعي: 

1. ابدأ اعمله تنفس صناعى
2. اتصل بالإسعاف على رقم 123

3- حروق المواد الكيميائية:

الوقاية:

1- البس جوانتى أو مريلة لو عندك

2- ماتعرضش نفسك للكيماويات

العلاج من حروق المواد الكيميائية:

1- اغسل مناطق الإصابة بالمياه لمدة 20 دقيقة على الأقل أو لحد ما الإسعاف توصل

2- ماتخليش المياه تيجي على أماكن غير اللي فيها حرق

3- وأنت بتغسل الأماكن المصابة شيل أي مجوهرات أو ملابس إلا لو لازقة في الجلد

4- ماتحطش أي أحماض أو قلويات

5- ماتحطش مرهم مضاد حيوي على مكان الإصابة

6- غطي المنطقة المصابة بشاش معقم أو قماش نظيف.

حروق المواد الكيميائية بتصيب أماكن معينة أوقات زي العين وده ليه طرق التعامل معاه لوحدها وهو زي:

1- اغسل العين المصابة بالمياه كويس:

1.  حط عين المصاب فورا تحت الحنفية أو في طبق مياة لمدة من 15 لـ 30 دقيقة
2. خلي وش الشخص المصاب مايل للجنب بإتجاه العين المصابة لتحت
3. ماترشش مياه في عين المصاب
4. خلي المصاب يفتح عينه على قد ما يقدر
5. اغسل إيد المصاب كويس علشان تتأكد مافيش أي مواد كيماوية باقية عليها
6. لو المصاب لابس عدسات لاصقة غرق عينه بالميه لحد ما تتشال
7. ماتدعكش العين أو تغطيها بشاش
8. أثناء ما أنت مستنى المساعدة خلي المصاب يلبس نظارة شمس علشان يقلل من حساسية الضوء

2- وخلي بالك من الكيماويات القلوية زي الأمونيا و مواد تنظيف البوتاجاز عشان ممكن تسبب إصابات شديدة من غير ما تحس بأي ألم

3- حاول تعرف إيه المواد اللي دخلت فى العين و تبلغ الدكتور عشان يقدر يعالج المصاب بطريقة صح

 وفي الآخر حبينا نقولك خلي بالك من نفسك ومن كل اللي بتحبهم.