11 علامة بتدل على وجود مشكلة في القلب

أمراض القلب هي السبب الرئيسي للوفاة في العالم بين الستات والرجالة، وبالرغم من إن الأعراض زي ضيق الصدر وألم الجزء العلوي من الجسم بتكون واضحة أوي لكن النوبات القلبية ليها مجموعة أعراض واللي ممكن بسهولة تتلخبط بينها وبين أي مرض تاني.

 وبعض الأمراض اللي ممكن تنتنج عن القلب الغير صحي:

1- النوبات القلبية:بيتم قطع تدفق الدم وبالتالي الأكسجين إلى القلب بشكل جزئي وبتحصل النوبات القلبية بسبب انسداد الشرايين.

2- قصور القلب: ده بيحصل لما القلب بيكون مش قادر على ضخ الدم للداخل والخارج بالطريقة اللي بيشتغل بها بشكل طبيعي.

3- أمراض القلب التاجية: بتحصل أمراض القلب التاجية لما بتتراكم البلاك في الشرايين التاجية في القلب. 

4- السكتات الدماغية: بتحصل لما بيتوقف تدفق الدم من القلب للدماغ.

وفيه شوية علامات بتقول إن احتمال تبقى مصاب بأمراض القلب، وبالرغم إن الأعراض دي مش مؤشر قوي لكن لو استمرت أو زادت أو كان فيه عوامل خطر عندك زي إن سنك تخطى الـ 60 أو بتعاني من زيادة الوزن أو بتعاني من مرض السكر أو ارتفاع الكوليسترول فخلي بالك من العلامات دي واسأل دكتور:

1- ألم في الصدر:

عادة بيستمر الألم أكتر من دقايق وبيحصل لما تكون في حالة راحة ولو الألم ماخفش في خلال دقايق فأنت محتاج تكشف وتروح لدكتور.

2- الغثيان، وعسر الهضم، والحموضة المعوية، وآلام المعدة:

من المرحج إن الستات هما اللي بيعانوا من الأعراض دي أكتر من الرجالة، وطبعا ممكن يبقى الشخص عنده اضطراب في المعدة لأسباب كتير مالهاش علاقة بالقلب ممكن تبقى من أكلة لكن لو حد  ظهر عليه أكتر من عرض ممكن يبقى أعراض نوبة قلبية فأنت برضه محتاج تستشير دكتور.

3- ألم بينتشر في الدراع:

من الأعراض التقليدية للنوبة القلبية الألم اللي بينتشر أسفل الجنب الشمال من الجسم واللي بيبد من الصدر وبيتحرك لبرا.

4- الإحساس بالدوخة والدوار:

فيه أسباب كتير بتخلي الشخص يفقد توازنه أو بيعاني من الإغماء، فممكن تبقى ماكلتش أو ماشربتش أو قومت تقف بسرعة كبيرة، لكن لو حسيت بضيق في التنفس وضيق في صدرك فأنت محتاج تستشير دكتور بسرعة لإن ده معناه إن قلبك مش قادر يضخ الدم بشكل صح.

5- ألام الحلق والفك:

ممكن يبقى ألم الحلق أو الفك بسبب مشكلة في العضلات أو بسبب نزلة برد أو مشكلة في جيوب الأنفية، وممكن يبقى بسبب مشاكل في القلب لكن لو حسيت بضغط أو ألم في صدرك مع ألام الحلق والفك فروح لدكتور على طول.

6- بتحس إنك مرهق بسهولة:

الحاجات البسيطة اللي بتعملها زي إنك لو طلعت السلم أو شيلت حاجات من العربية للبيت فأنت محتاج تكشف برضه لإن النوع ده من التغييرات بيدل على وجود مشكلة، وممكن يبقى الإرهاق الشديد أو الضعف غير المبرر من أعراض أمراض القلب خصوصا للستات.

7- الشخير:

طبيعي أي حد ممكن يشخر وهو نايم لكن لو كان بصوت عالي على غير العادي كأن الشخص بيتخنق وهو نايم فدي علامة على توقف التنفس أثناء النوم، ولو ده حصل بيكون ضغط إضافي على القلب، وعشان تعرف الشخير ده طبيعي ولا علامة على مشكلة على القلب محتاج تزور دكتور.

8- التعرق:

العرق البارد أثناء النوم من غير سبب واضح بيدل على وجود مشكلة ولو ده حصل مع وجود أعراض تانية كلم دكتور على طول.

9- كحة مابتنتهيش:

الكحة اللي مابتتوقفش في معظم الحالات مش دليل واضح على وجود مشكلة في القلب، لكن لو كنت مصاب بمشكلة في القلب فخلي بالك للاحتمال ده خصوصا لو فيه مخاط أبيض أو وردي فدي علامة على قصور في القلب، وده بيحصل لما بيكون القلب مش قادر يواكب متطلبات الجسم وبيتسرب الدم للرئتين، فلو بتكح بقالك كتير فأنت محتاج تسأل دكتورك عن سبب الكحة بالظبط.

10- تورم الرجلين والساقين:

تورم الرجلين بيبقى علامة على فشل القلب، وممكن تلاحظ إن رجلك بقيت بتورم بعد ما تشيل الجزمة من رجلك في نهاية اليوم، أو بعد ما تقعد فترة طويلة لإن الجاذبية بتزود من كمية ضغط الدم في الأطراف السفلية، 

11- عدم انتظام ضربات القلب:

نبضات القلب غير المنتظمةمعناها إن القلب مابيضخش الدم بإيقاعه الطبيعي، وبالرغم من إنك ممكن تكون بصحة جيدة نسبيًا، إلا إنه مؤشر على فشل القلب أو نوبة قلبية.  

وارتفاع ضغط الدم ومرض الشريان التاجي ممكن يكونوا هما السببين الأساسيين لاضطرابات الأوعية الدموية، زي ضربات القلب غير المنتظمة.