حكاية الشهور القبطية.. والأمثال المرتبطة بيها!

مع البرد اللي إحنا فيه ده، ممكن تلاقي نفسك سمعت المثل ده من اي شخص كبير حواليك وهو “برد طوبة يخلي الشابة كركوبة” أو مع دخلة مارس ورياح الخماسين ممكن تسمع “أمشير أبو الزعابيب الكتير ياخد العجوزة ويطير”

إيه بقى حكاية الأسامي والأمثال دي، هنقولك أهو

ده هو التقويم القبطي ويعتبر أول تقويم عرفه العالم وبدء العمل به  في عام 4241 قبل الميلاد عند المصريين القدماء، وارتبط عند الفلاح المصري بالسنة الزراعية، وقسم المصريون القدماء السنة الزراعية إلى ثلاثة فصول كبرى هي: فصل الفيضان (آخت) وفصل البذر والزرع (برت) وفصل الحصاد (شمو) 

وقسموا السنة لـ 12 شهر وكل شهر 30 يوم، وأضافوا المدة الباقية اللي هي خمس أيام وربع، وخلوها شهر لوحده  سموه الشهر الصغير (أو النسيء) وبذلك أصبحت السنة المصرية 365 يومًا في السنوات البسيطة و366 يومًا في السنوات الكبيسة

واتبع الفلاح المصري من أقدم العصور  التقويم ده لأنه مطابق للمواسم الزراعية

وشهور السنة القبطية هي

1-“توت” وبيكون من 11 سبتمبر لـ 10 أكتوبر 

 والأمثال الشعبية المرتبطة بيه هي “توت يقول للحر موت”، وذلك بسبب نهاية الصيف وانكسار الحرارة، وكمان بيتقال  “توت ري ولا تفوت” أي الفلاح اللي مش بيروي أرضه في الشهر ده مش  بيستفيد من زراعتها، وكمان “التوت الكتكوت ياكل فيه ويموت” عشان اتقال أن الكتاكيت بتصاب بالأمراض في الشهر ده

2-  “بابه” وبيكون من 11 أكتوبر 10 لـ نوفمبر 

والمثل الشعبي المرتبط بيه هو”بابه خش واقفل البوابة” وده عشان بداية البرد في الوقت ده من السنة و في أمثال تانية زي “إن صح زرع بابه يغلب النهابة”، و”إن خاب زرع بابه ما يجبش ولا لبابة” أي أن كثرة المحصول في بابه مربحة مهما اتنهب منها، واسم “بابه” هو الإسم الأصلي لمدينة الأقصر

3- هاتور  وبيكون من 11 نوفمبر لـ 9 ديسمبر

والأمثال المرتبطة بيه هي “هاتور أبو الدهب المنتور”، و”إن فاتك زرع هاتور أصبر لما السنة تدور” فهو الشهر الأمثل لزراعة  القمح، واسم “هاتور” مشتق من اسم “حتحور” وهي آلهة الحب والعطاء والموسيقى عند قدماء المصريين 

4-  “كيهك” وبيكون من 10 ديسمبر لـ 8 يناير

والمثل المرتبط بيه هو “كياك صباحك مساك، شيل إيدك من غداك حطها في عشاك” واللي هو كناية عن قصر النهار  وطول الليل في الوقت ده

5-  “طوبة” وبيكون من 9 يناير لـ 7 فبراير

والمثل المرتبط بيه هو “الجو في  طوبة يخلي الشابة كركوبة من البرد والرطوبة”   وده بيعبر عن شدة البرد اللي ممكن تخلي الشابة تبرد زي الست العجوزة 

6-  “أمشير” وبيكون من 8 فبراير  لـ 10 مارس

والمثل المرتبط بيه هو “أمشير أبو الزعابيب الكتير ياخد العجوزة ويطير” وده بسبب زيادة الزوابع والأمطار في الشهر دع وفي مثل تاني برضه بيقول“يفصص الجسم نسير نسير” يعني يقطع الجسم حتت

7 -“برمهات” وده بيكون من 10 مارس  لـ8 أبريل

 والمثل المرتبط بيه  هو “برمهات روح الغيط وهات” وده عشان موسم الحصاد،واتقال عليه كمان شهر الشمس والحرارة الصغيرة لأن بيكون نهاية البرد فيه وبداية ارتفاع درجات الحرارة

8-  “برمودة” وده بيكون من 9 أبريل لـ 8 مايو 

والمثل المرتبط بيه هو “برمودة دق العمودة” أي دق سنابل القمح بعد نضجها، لأن ده بيكون موسم حصاد القمح وكمان بيكون فيه أعياد الربيع والاحتفال بشم النسيم

9-  “بشنس” وده بيكون من 9  مايو لـ 7يونيو

والمثل المرتبط بيه هو “الشمس في بشنس تكنس الغيط كنس” وده تعبير عن حرارة الجو في الوقت ده من السنة، وبيبقى نهاية فصل الربيع واقتراب بداية فصل الصيف 

10-  “بؤونة” وده بيكون من 8 يونيو لـ 7 يوليو

والمثل المرتبط بيه هو “بؤونة فلاق الحجر”  ومعناه إنه  من شدة الحرارة ينفلق الحجر، وفي مثل تاني برضه وهو ” بؤونة تكتر فيه الحرارة الملعونة” 

11-  “أبيب” ويقع في الفترة من 8 يوليو لـ 6 أغسطس

 والأمثلة المرتبطة بيه هي “أبيب فيه العنب يطيب” وده عشان موسم العنب في الفترة دي و في مثل تاني وهو “من يأكل الملوخية في أبيب يجيب لبطنه طبيب”  وعناه إن الملوخية غير مستحبة في الجو الحر، واللي هياكلها هيمرض ونجيبله دكتور

12- “مسري” وبيكون من  7 أغسطس لـ 5 سبتمبر 

 والمثل المرتبط بيه هو “مسري تجري فيه كل ترعة عسرة”وده عشان زيادة فيضان النيل في الوقت ده، وإن حتى الترع الجافة الميه هتغمرها

وبيقول “ أبو العباس القلشقندي”  وهو مؤرخ وأديب عربي في كتابه “صبح الأعشي في صناعة الانشا” واللي بيعتبر  موسوعة شاملة لجميع العلوم الشرعية والأدبية والجغرافية والتاريخية، قال في الكتاب على لسان أحد الرحالة عن الشهور القبطية “عرفت أكثر المعمور من الأرض، فلم أر مثل ما بمصر من ماء طوبة ولبن أمشير وخروب برمهات وورد برمودة ونبق بشنس وتين بؤونة وعسل أبيب وعنب مسري ورطب توت ورمان بابه وموز هاتور وسمك كيهك”.