طريقة برايل.. اعرف بدأت إزاي!

سنة 1812م حصلت حادثة في مدينة باريس عاصمة فرنسا وتحديدًا في بلد اسمها كوبفراي.. حادثة عادية ممكن نسمع عنها كل يوم وهي طفل شقي عنده 3 سنين بيحب يلعب ويستكشف فالطفل اتعور.. لويس اتصاب بجرح في عينه وبسبب العدوى بعد كده مابقاش يشوف بعينه خالص، لكن مش دي أخر القصة دي لسه البداية.

الطفل ده هو لويس برايل اللي اتولد 4 يناير 1809 وبسبب الحادثة اللي خليته مايشوفش كان رافض فكرة إنها تأثر على حياته ومستقبله واخترع طريقة برايل عشان تساعده على القراءة والكتابة وقدم خدمة عظيمة لكتير من ضعاف البصر والمكفوفين وده وفقًا لموقع brailleworks.com

وعشان كده قررت الجمعية العامة للأمم المتحدة في نوفمبر 2018م أنه يكون 4 يناير  يوم طريقة برايل تكريمًا لذكرى ميلاده.

تطور طريقة برايل بدأ بمرحلتين مهمين…

– بيرجع تاريخ طريقة برايل لأوائل القرن الـ19 لجندي في جيش نابليون اسمه تشارلز باربييه اخترع نظام “الكتابة الليلية” الاختراع ده خلى الجنود يتواصلوا بشكل آمن بدل ما كانوا بيتواصلوا عن طريق الرسايل الكتابية وينوروا عشان يشوفوا الرسايل دي ويتعرضوا لهجوم العدو لأنه بيكتشف أماكنهم وفقدوا فعلًا أعداد كبيرة من الجنود.

كانت الشفرة عبارة عن صفين بشكل رأسي كل صف 6 نقط وكده مجموعهم 12

– بعد كده في القرن ال19 برضه وفي واحدة من المدارس الأولى للمكفوفين في العالم، لويس برايل وهو عنده حوالي 11 سنة اخترع كود خاص به وبنى أساسياته من اختراع الكتابة الليلية اللي اتكلمنا عنها فوق.

وغير الشفرة وقلل عدد النقط عشان تكون صفين بشكل رأسي كل صف 3 نقط وكده مجموعهم 6 عشان يكون لمس الايد ليها أسهل وأسرع.

تواريخ فرقت في تطور لغة برايل…

1854 – بعد وفاة لويس برايل بسنة اعتمدت فرنسا طريقة برايل نظامًا للتواصل بين المكفوفين.

1860 – تبنت مدرسة ميسوري للمكفوفين في سانت لويس في أمريكا طريقة برايل لتعليم المكفوفين وبدأ بعدها إصدار قوانين لحماية حقوق المكفوفين.

1932 – تم اعتماد كود برايل كرمز قياسي للغة الإنجليزية.

من عام 1932 إلى أواخر الستينيات – تم تعليم معظم الطلاب المصابين بالعمى القراءة والكتابة بطريقة برايل.

1975 – أصدر الكونجرس الأمريكي القانون العام 94-142 اسمه قانون تعليم جميع الأطفال المعاقين ، واللي بيشمل قانون التعليم المجاني والمناسب (FAPE).

1997 – في حالة الطفل المكفوف أو ضعيف البصر ، يجب توفير تعليم بطريقة برايل لمحو أمية الأطفال والكبار

وحصل شكل من أشكال الدعم من دول كتير زي:

كندا وروسيا والهند والمكسيك ودول من الاتحاد الأوروبي واللي ساعدوا المكفوفين على مقاومة التحديات اللي بيتعرضوا لها وأصدروا عملات مطبوع عليها بلغة برايل البارزة عشان المكفوفين يقدروا يحدووا قيمة العملة.

وبريطانيا كمان كانت من أوائل الدول اللي أصدرت قانون يلزم بكتابة إضافية بطريقة برايل على علب الأدوية.

وألمانيا اللي عملت خريطة بطريقة برايل في أحد قطاراتها

وفي النهاية كتير مننا بتحصله حاجات مأسوية في حياته، لكن قليل جدًا اللي بيتحدى أزمته ويقاوم كل اليأس والإحباطات المحيطة ويختار يكون طاقة نور لكل اللي زيه أو بعد منه ويكون مصدر إلهام زي لويس برايل.