إزاي تصحي في ميعادك كل يوم؟

الصراع الداخلي اليومي اللي محدش بيحبه، صراع الصحيان من النوم خصوصًا لو في فصل الشتاء، العلماء والدكاترة بيصنفوا حالة الصحيان دي بالخمول أو الكسل، لو أنت من ضمن الناس اللي عندهم خمول.. اعرف شوية النصايح دي عشان تصحي من النوم أسرع:

1- سيب النور الطبيعي يدخل

دماغنا بتستجيب للنور الطبيعي عن طريق إرسال إشارات للجهاز العصبي اللي بترفع درجة حرارة الجسم، فبينتج هرمون الكورتيزول وبيقلل كمية الميلاتونين اللي بيحفز على النوم، عشان كده لازم تتأكد إن مفيش ستاير تقيلة بتحجب الضوء عن الأوضة، وأول ما تصحي أقفل النور وأفتح الستاير، وفي أوقات الشتاء الشمس بتتأخر في الشروق، ممكن وقتها تستخدم المنبهات اللي فيها لمبة.

2- خلي الوصول للمنبه صعب 

علّى صوت المنبه لأعلى درجة لأن الصوت العالي هيحفز الأدرينالين في جسمك، وخلي المنبه في مكان بعيد عنك عشان تقوم من السرير وتوصله.

3- أبعد على كلمة غفوة أو Snooze

خليك فاكر إن النوم اللي هتنامه بعدها هيبقى نوم وحش ومقلق، وفي كل مرة هتدوس Snooze هيبقى صعب أكتر تصحى.

4- استخدم التكنولوجيا 

نزل أي أبليكيشن بيساعدك تصحي، زي الأبليكيشنز اللي فيها منبه مابيقفلش غير لما تحل مسألة رياضية، وخليك عارف إن النور اللي خارج من الإلكترونيات بيأثر على نومك عشان كده حاول تقفلها على الأقل بساعة قبل ما تنام.

5- اتنفس بعمق

لإن التنفس هيساعدك تفوق أسرع وهيساعدك كمان تركز وتقابل يومك بحيوية أكتر، فأعمل شوية تمارين تنفس لأنه كمان هيساعد على زيادة نسبة الأكسجين في الدم.

6- أشرب مياه أول ما تصحى 

لأن جسمك هيكون جاف طول الليل، فأول ما تصحى من النوم أشرب كوباية مياه على طول، وبعض التجارب أثبتت إن ما تصحى من النوم وتشرب مياه، ده ممكن يساعد في إنقاص وزنك.

7- نام بدري

آه دي بديهيات.. فعلا لازم تنام 8 ساعات لإن ده هيساعدك تنام كويس وتصحى فايق.

8- ظبط حاجاتك قبل النوم

لما تخلص اللي وراك قبل ما تنام، ده هيمنعك من الإحساس بالإرهاق وإن عليك واجب تقيل لما تصحى، زي مثلا إنك تحضر الفطار وتجهز شنطتك قبل ما تنام، أو تجهز هدومك اللي هتلبسها.